2025 senesi ilk qış ayınıñ 6-nda aqşam Qırımtatar Milliy Meclisi işğal etilgen Qırımnı terk etmege mecbur olğan ve Almaniyada vaqtınca yaşağan qırımtatarlar ile onlayn körüşüv keçirdi. Bu aqta öz telegram kanalında Meclis reisi Refat Çubarov bildirdi.
Onıñ qayd etkenine köre, açıq dialog formatında keçirilgen onlayn körüşüvde iştirak etmek imkân Almaniyada yaşağan ve evelden qayd olğan er bir semetdeşke berilgen.
Umumen onlayn körüşüvde iştirak etmek içün 38 insan qayd etildi.
Qırımtatar Milliy Meclisinden qırımtatar halqınıñ lideri Mustafa Cemilev, Meclis reisi Refat Çubarov ve onıñ muavinleri İlmi Ümerov ve Ahtem Çiygoz, Meclis azaları Eskender Bariyev, Abmedcit Suleymanov, Riza Şevkiyev ve Gayana Yüksel iştirak ettiler.
Berilgen malümatqa köre, online körüşüv aman-aman üç saat devam etken, iştirakçiler Almaniyada vaqtınca bulunğan semetdeşlerniñ ayatınıñ çeşit tarafları ile bağlı meselelerni muzakere etkenler. Çıqışta bulunğanlar semetdeşlerniñ ğayret ve teşebbüslerini birleştirmek ve öz faaliyetini Qırımtatar Milliy Meclisinen uyğunlaştırmaq kerekligini qayd ettiler.
Yaqın vaqıtta azırlanıp, yañı körüşüvde Almaniyada bildirilgen ğayelerni amelge keçirmek içün muayyen teklif ve areketlerni beraberlikte baqmağa qarar alındı.
Refat Çubarov bildirdi ki, Qırımtatar Milliy Meclisiniñ azaları onlayn körüşüvniñ münderecesinden memnün qaldılar ve Almaniyadaki qırımtatar diasporası qırımtatar milliy areketiniñ müim bir qısmı olacağına işanç bildirdi.
Rusiyeniñ Ukrayinağa ait Qırım işğalinden soñ Kremlniñ diskriminasion siyaseti neticesinde qırımtatarlar Qırım yarımadasından kütleviy sürette çıqıp kettiler. Hususan bu esnas Rusiyeniñ Ukrayinağa tam kölemli cenki başlağanınen quvetleşti. Qırımtatar halqınıñ lideri Mustafa Cemilevniñ tahminlerine köre, umumen Qırımnı 50 biñ qırımtatarı terk etti, yani yarımadada yaşağan qırımtatar halqınıñ dörtte biri.
